காந்தியின் இறுதி நாட்களுடனான என் பயணம் - ஜூலை 19,1947. நாள் - 196

இன்றைய தினம் உலகத்தில் பல்வேரு முக்கிய நிகழ்வுகள் நடந்தாலும் காந்திஜி எப்பொழுதும் போல இரவு நெடுநேரம் தொடரும் வேலைகளை ஆரம்பித்தார். பிரார்த்தனை மற்றும் காங்கிரஸ் செயற்குழுக் கூட்டத்தில் கலந்துகொண்டார். வழக்கம் போல் மலையென குவிந்து கிடைக்கும் கடிதங்களை, தந்திகளை படித்து பதில் அனுப்பும் வேலையை செய்யத் தொடங்கினார்.

அன்று வந்த தந்திகளில் முக்கியமான ஒன்று இந்தியாவின் தேசிய மொழியாக இந்தியை அரசியல் அமைப்புச் சட்ட அவையில் காங்கிரஸ் ஏற்றுக் கொண்டதற்கு அவர் பெரிதும் வருந்தினார். அதற்கு இணையாக உருது வரி வடிவத்தையும் சேர்க்க வேண்டும் என்று கோரிக்கை விடுத்திருந்தார்.

அவர் காங்கிரஸ் கட்சியில் பதவியை பிடிக்க ஏற்பட்டு இருக்கும் பைத்தியகாரத் தனமான வெறி குறித்து செயற்குழு உறுப்பினர்கள் அதிர்ச்சியானதை அன்றைய மாலை பிரார்த்தனையில் முன்வைத்தார். மக்கள் சேவைக்காக உருவாக்கப்பட்ட அமைப்பில் இவ்வாறு நடப்பது சேவைக்கான வீழ்ச்சியாகவே பார்த்தார் காந்தி. அரசு பணிகளில் நுழைபவர்களும், தலைவர்களும் நாம் இந்த நாட்டிற்கும், மக்களுக்கும் உன்னத பணிகளை செய்கிறோம் என்ற உணர்வுடன் சேவையாக, கடமையாக செய்ய வேண்டும் என்றார்.

நம் நாட்டில் இன்று நடக்கும் அத்துனை பிரச்சினைகளையும் அவர் அன்றே விவாதித்துள்ளார் என்பது தான் வியப்பிற்குரியது. ஏறத்தாழ 100 ஆண்டுகள் ஆகப் போகிறது. அவர் நம் எல்லாத் தலைமுறைக்கும் சேர்த்து தான் சிந்தித்துள்ளார். எல்லா சிக்கல்களுக்கும் அவர் அன்றே தீர்வுகளை ஆராய்ந்து தேடியிருக்கிறார்.

அன்றே பசுவதைக்கு தடை சட்டம் கேட்டு இந்துக்கள் முறையிட்டுள்ளனர். ஆனால் இவ்வாறு கோரிக்கை வைத்துள்ள இந்துக்களை பார்த்து காந்தியடிகள் "பசுவதை வேண்டாம் என்று கூறும் பல இந்துக்கள் தன் பசுக்களை பட்டினி போடுகிறார்கள். அவற்றை துன்புறுத்துகிறார்கள். பால் வற்றிய பசுக்களை, காளை கன்றுகளை கசாப்புக்கு விற்கிறார்கள். இப்படி பசுவிற்கு எதிராக செயல் புரிந்துவிட்டு மதத்திற்காக சட்டம் இயற்ற கேட்பது மோசமானது" இவ்வாறு கேள்விகளை மாலை பிரார்த்தனையில் எழுப்பினார்.

அவர் பேசி 73 ஆண்டுகள் ஆகியும் இன்றும் இந்த பசுவதை சிக்கல் நீடித்துக் கொண்டே இருக்கிறது. அதுவும் இன்று அரசாங்கமே இதை பெரிதுபடுத்தி மத சார்புடன் பாராபட்சமாக  நடந்துகொள்கிறது. பசுவதையை வைத்து இன்று எத்துனை கலவரங்கள், உயிரிழப்புகள் நடந்தவண்ணம் உள்ளது. அதை இன்றைய அரசே ஊக்குவிக்கிறது என்பது தான் வேதனைக்குரியது.

காந்திஜி ஜாதி மதம் சாராமல் என்றும் நடுநிலைமையுடனே தான் ஒவ்வொரு பிரச்சனைகளையும் அணுகினார். அவர் மனிதத்தையும், அறத்தையும் கொண்டே செயல்பட்டார். சகிப்புத் தன்மையும், சரியான புரிதலும் சேவை செய்ய தேவை என்று கூறினார்.

"மகத்தான செயல்களைச் செய்ய முயலும் அனைவருக்கும் எல்லையற்ற பொறுமை தேவைப்படுகிறது"  - காந்திஜி