இன்றைய காந்திகள்

என் முதல் உரை

ஐந்தாம் வகுப்பு படிக்கும்போதிருந்து புத்தகம் வாசிக்கும் பழக்கம் உருவானது. அப்பொழுதெல்லாம் ராஜேஷ்குமார் நாவல்கள், கண்மணி, விகடன், குங்குமம் போன்ற இதழ்கள் வழியாகத் தான் வாசிப்பைத் தொடங்கினேன். பிறகு என் அண்ணனின் வழிகாட்டுதலின் மூலம் நல்ல புத்தகங்களை கண்டடைந்தேன்.

வாசிப்பு என்னை தனித்துக் காட்டியது. புத்தகங்கள் என் வாழ்க்கையை சீராக்கியது என்றே சொல்ல வேண்டும். வேலையில் சேர்ந்த பிறகு மிகப் பெரிய போராளி ஆனேன். ஆம் முகநூல் போராளி. முகநூலில் அதிகம் கத்திக் கொண்டிருந்தேன். பெரிய மாற்றம் வேண்டும் என்று தோன்றியதே தவிர அதை எப்படி கொண்டுவருவது என்று சற்றும் அறியாமலிருந்தேன்.

பள்ளி காலம் தொட்டே காந்தி அனைவருக்கும் அறிமுகமானவர். ஆனால் காலம் செல்லச் செல்ல அவரை பற்றிய அவதூறுகள் தான் என்னை அதிகம் வந்தடைந்தது. அதனால் அவர் மீது பெரும் வெறுப்பும், ஈர்ப்புமற்று அவரை ஒதுக்கியே வைத்திருந்தேன் என்று கூட சொல்லலாம். குக்கூ நண்பர்களை சந்தித்த பிறகு தான் உண்மையான காந்தி பற்றி அறியத் தொடங்கினேன்.

அதன் பிறகு தான் காந்தியை பற்றியும் அவரின் நூல்களையும் வாசிக்க ஆரம்பித்தேன். சொற்களை விட சாட்சியங்கள் தான் அதிகம் பேசும். ஆம் காந்தியை பற்றி எளிதாகவும், அவரின் செயல் விளைவுகளைக் கண்கூடாகவும் அறிய இன்றைய காந்திகள் புத்தகமே எனக்கு கிடைத்த வரம் என்று கூறுவேன். இன்றைய காந்திகள் புத்தகத்தில் வரும் அனைவரும் காந்தியத்தின் சாட்சிகள்.

இப்புத்தகத்தில் வரும் ஒவ்வொருவரின் வாழ்வும், அவர்களால் ஏற்பட்ட சமூக மாற்றத்தையும், அதன் பலனையும் வாசிக்கும்பொழுது நாமே அந்த நபராக மாறிவிடுவதை காணலாம். இவ்வளவு வாழும் சாட்சியங்களை நம் கண்முன்னே கொண்டு வந்து நிறுத்தியிருக்கிறார் இப்புத்தகத்தை எழுதிய பாலா அண்ணா. இப்புத்தகம் எனக்குள் மிகப் பெரிய தாக்கத்தை ஏற்படுத்தியிருக்கிறது. ஒவ்வொரு நாளும் ஏற்படுத்துகிறது.

ஆம் இந்த நோயச்ச காலத்தில் தனியார் பள்ளிகள் ஆன்லைன் வகுப்புகள் வைத்து நடத்திக் கொண்டிருக்கையில், அரசு பள்ளி மாணவர்களுக்கு என்னால் முடிந்த நேரத்தை செலவிடலாம் என்று தினமும் மாலை 5 மணியிலிருந்து 8 மணி வரை புலியானுர் கிராம குழந்தைகளுடன் உரையாடுகிறேன். காந்தி கூறியது போல நாம் சமூக மாற்றத்தை விரும்பினால் அடித்தட்டு மக்களிடம் சென்று அவர்களுடன் இருந்து வேலை செய்ய வேண்டும் என்பது எவ்வளவு பெரிய உண்மை என்பதை உணர்கிறேன்.

உங்களை மாற்றிய ஒரு புத்தகம் எது என்று கேட்டால் யோசிக்காமல் இப்புத்தகத்தை கூறுவேன். வெறும் முகநூல் போராளியாக மட்டும் இருந்த என்னை, எண்ணத்தை எங்கு எப்படி செயலாக மாற்ற வேண்டும் என்ற தெளிவையும், அறிவையும் கொடுத்தது இப்புத்தகம். தினமும் மாலை 5 மணிக்காக ஏங்கித் தவிக்ககிற மனதையும், அவர்களுக்காக ஓடுகிற சக்தியையும் எனக்கு இன்றைய காந்திகள் புத்தகம் மூலமே கிடைத்தது.